A Beautiful Affair (ABS-CBN): Kabanata/Episode 60

Kabanata 60

Naghasik na nga ng lagim si Henry. Sa araw ng pagdalaw sa kanya ni Leon ay magpapanggap ito na naininikip ang dibdib at dadalhin sa pagamutan ng mga kasabwat niyang nakaibang-bihis upang hindi mapansin. Sa salu-salo ng mga Pierro at Saavedra ang kanyang tuloy. Natunugan naman ito agad ni Leon kaya dali-dali siyang nakahingi ng tulong. Putol ang bahagi na ito ng mga kaganapan at ipapakita na lamang makalipas ng anim na buwan na nakaligtas silang lahat at si Henry ang namatay sa pagkakahulog at pagsabog matapos siya pagtulungan nila Edward at Leon. Sa huli ay si Leon at Gen din ang nagkatuluyan. Ganoon din naman sina Ava at Harry. Si Edward naman ay ipapakita na lulan ng kanyang sasakyan at papunta sa kung saanmang lugar na may kalayuan. Siya mag-isa.

A Beautiful Affair (ABS-CBN): Kabanata/Episode 59

Kabanata 59

Habang nagpapagaling sa pagamutan ay makakatanggap si Leon ng tawag mula kay Edward ukol sa pagpanaw ni Carlotta. Naroon naman upang umalalay sina Gen, Emy, Fred at Mang Epong. Sa paghahatid kay Carlotta sa huling hantungan, isang bagong simula ang nais salubungin ng mga Pierro at nais na nilang itama ang lahat ng mali. Hihingi si Arturo ng tawad sa mga anak at sa apong si Leon. Ipapawalang bisa ni Edward ang pagiging mag-asawa nila ni Gen. Ibabalik nila kay Henry ang bahagi ng Lucia na nararapat sa kanya. Tatanggi si Sabrina sa una ngunit papayag na rin matapos takutin ni Edward at ni Harry. Si Leon na ang mamamahala sa Meraviglie at sa PGC ngayong isa na siyang ganap na Pierro, at dahil hindi na mag-asawa si Gen at Edward ay malaya na silang dalawa na maging maligaya. Si Edward naman ay magpapasya na iwan muna ang lahat at magpakalayu-layo. Mukhang maayos na ang lahat, subalit may pahabol pang balak si Henry upang maghiganti sa kanilang lahat.

A Beautiful Affair (ABS-CBN): Kabanata/Episode 58

Kabanata 58

Kakailanganing iwanan ni Gen si Leon upang humingi ng tulong dahil nauubusan na ito ng dugo. Makakahanap siya ng dalawang tao na tutulong sa kanya at makatatawag ito kay Edward upang idulog ang mga pangyayari. Mabilis naman na sasaklolo si Edward at uutusan na rin sila Harry na huwag nang tutuloy sa piging na alay sa Meraviglie dahil nga sa banta ni Henry sa kani-kanilang mga buhay. Mahahanap ni Carlotta si Leon at magkakaroon ng pagkakataon ang dalawa upang makapag-usap ng masinsinan, kung saan sasabihin ni Leon sa ina na maari niya itong matanggap, ngunit hindi pa sa ngayon. Matutunton ng mga kinauukulan si Henry at sa bigong pagtakas nito ay susubukan siyang pasukuin ni Carlotta. Dahil sa katigasan ng kanyang ulo, ikamamatay ni Carlotta ang pagligtas sa kanyang buhay.

A Beautiful Affair (ABS-CBN): Kabanata/Episode 57

Kabanata 57

Nasa kamay pa rin ni Henry sina Gen at Leon at tamang tama lamang na darating si Carlotta upang ibahagi ang magandang balita kay Henry na si Leon ang nawawala nilang anak. Laking gulat na lamang niya na madatnan si Leon na duguan sa upuan at papatayin na ni Henry. Ang pagdating niyang ito ang magliligtas sa anak. Dito na rin maibubunyag ang lahat ng lihim, kahit na si Henry na lang ang hindi nakakaalam. Matapos nitong malaman ang totoo ay manlulumo ito ngunit hindi magtatagal ay uunahin pa rin niya ang masamang balak laban sa mga Saavedra at mga Pierro sa halip na pakawalan sina Leon at Gen. Dahil alam ni Carlotta na ganito ang mangyayari, gagawa siya ng paraan upang makatakas ang dalawa, ngunit magpapaiwan upang magpanggap na sang-ayon pa rin siya kay Henry. Makakatakas sina Gen at Leon ngunit sa sugatan na kalagayan ni Leon, makalalayo kaya sila sa kapahamakan?

A Beautiful Affair (ABS-CBN): Kabanata/Episode 56

Kabanata 56

Sasabihin na ni Emy kay Leon na si Carlotta ang kanyang ina. Hindi ito matatanggap ng binata at pipiliin na huwag na lang ito ipaalam pa sa kahit na sino. Iniisip kasi niya ang kalalabasan ng lahat at kung paanong lulubha pa lalo ang kalagayan nila ni Gen ngayon pa na lagi na silang pinasusundan ni Edward. Mahuhuli ni Edward ang dalawa sa Ropa matapos sabihin ni Leon kay Gen na si Carlotta ang kanyang ina. Isang away sa pagitan ng dalawang lalaki ang magaganap. Hindi nila sasabihin kay Edward ang totoo ukol sa pagkatao ni Leon. Muling babalik si Carlotta kila Emy ngunit magmamatigas pa rin ito na hindi sabihin ang totoo sa kabila ng pagmamakaawa ni Carlotta. Hindi makakatiis si Mang Epong at ilalantad nito ang totoo kapalit ng pangako na mamahalin nito at pangangalagaan ang anak gaya ng kanyang ginawa sa nakalipas na mga taon. Sa pag-alis nila Gen at Leon sa Ropa ay dudukutin sila ng mga tauhan ni Henry at malalagay sa alanganin ang kanilang mga buhay.

A Beautiful Affair (ABS-CBN): Kabanata/Episode 55

Kabanata 55

Kasabay ng pagsisisi ni Arturo ay ang paglabas ng mga lihim ng nakalipas at ang mga bagay na nag-uugnay sa kanilang mga Pierro, mga Saavedra at kay Henry. Ang lolo ni Henry ang tunay na may-ari ng Lucia ngunit napunta ito sa mga lolo nila Gen at Edward. Lalo pang tumindi ang mga kasalanan nila kay Henry ng iutos ni Arturo na ipapatay ito. Sa ngayon ay kumikilos na rin si Henry sa tulong ni Carlotta upang maghiganti at ipadukot ang mga may kaugnayan sa kaguluhang ito at kabilang doon si Gen. Tuloy pa rin ang paglabas labas nila Gen at Leon kahit sila ay nakabalik na sa Pilipinas, isang bagay na hindi ikinatutuwa ni Edward at magiging dahilan ng kanyang pagiging mainitin ang ulo kay Leon. Natunton na ni Carlotta si Emy at umamin dito siya si Amina. Hindi aaminin sa kanya ng dalaga na si Leon ang nawawala niyang anak.

A Beautiful Affair (ABS-CBN): Kabanata/Episode 54

Kabanata 54

Aaminin ni Gen kay Leon na usapan lamang ang pakikipag-isang dibdib niya kay Edward at hindi niya talaga ito mahal. Sa una ay magtataka ang binata kung bakit ito sinasabi sa kanya ni Gen subalit magpapasya rin ito sa wakas na gagawin ang lahat upang hindi na siya pakawalan at maghihintay sila hanggang matapos ang pangako sa mga taong pinangakuan bago nila habulin ang kanilang kaligayahan. Sa kabila nito ay babalaan pa rin ni Edward si Leon kahit na malinaw sa kanilang dalawa na ipaglalaban na ni Leon ang kanyang nararamdaman sa pagkakataong ito. Uuwi si Emy sa Agusan dahil pinasunog ni Carlotta ang bahay niya. Pasusundan siya nito upang matunton ang kinaroroonan ni Leon, at pati na rin ng nawawalang anak ni Carlotta.

A Beautiful Affair (ABS-CBN): Kabanata/Episode 53

Kabanata 53

Dahil sa pagkaabala ni Edward sa Meraviglie ay magkakaroon ng pagkakataon sina Leon at Gen na makasama ng madalas ang isa’t-isa at libutin ang lungsod upang mapawi ang pagkainip. Matapos ang kanilang naudlot na sana’y halikan noong nakaraang gabi, magtatagpo na naman ang kanilang mga landas at magsasaya naman ang dalawa na walang ginagawang hindi kanais-nais. Matapos magpalipas ng gabi na walang ginawa kundi magsiawitan at maglasing, uuwi si Gen kay Edward na wala sa sariling katinuan, at may mga masasabing mga bagay bagay na hindi dapat sabihin sa harapan ni Leon. Itutuloy nila ang pagliliwaliw kinabukasan, isang araw na puno ng tawanan at kasiyahan na tila ba nasa Vienna lang ulit silang dalawa.

A Beautiful Affair (ABS-CBN): Kabanata/Episode 52

Kabanata 52

Sa kanilang pagpunta sa Tokyo, hindi alam ni Gen na kasama pala nila si Leon, na magiging dahilan ng pagkakailangan nilang dalawa. Matapos ang pagpapakilala kay Ginoong Yamamoto at sa asawa nito at maiiwan pa si Edward upang ayusin ang ilan pang mga bagay na dapat ayusin upang maituloy na ang pagpapatayo ng Meraviglie. Dahil wala namang nakakaalam na usapan lamang nilang dalawa ang pagpapakasal, sa isang silid lamang tutuloy sina Edward at Gen. Aaminin sa kanya ni Edward na mahal pa rin siya nito at gagawin lahat upang maibalik ang dating pagtingin ni Gen sa kanya. Mukha namang hindi na ito mangyayari pa dahil andiyan na ulit si Leon at hindi maiwasang ipakita ni Gen na mahal pa rin niya talaga ito. Samantala, iniwan na rin si Carlotta ni Ava matapos malaman nito na pinalayas ng ate ang kanilang ama. Galit din siya sa ama ngunit natatakot siya sa kung ano ang maaring gawin ni Carlotta kahit pa ipinangako nito sa kanya na wala siyang masamang hangarin sa kapatid.

A Beautiful Affair (ABS-CBN): Kabanata/Episode 51

Kabanata 51

Lalapit si Arturo sa apo na si Ivan na gumuguhit ng larawan, isang larawan ng ama, ina at kapatid na hindi kilala ng matanda. Ito ang pagsisimulan ng isang matinding away sa pagitan nila ni Carlotta kung saan mapapatunayan ng huli na ang kanyang ama nga ang may pakana sa pagpapapatay kay Henry. Palalayasin ni Carlotta ang ama at sasaklolo naman si Edward na magiging dahilan upang magkaroon din ng isang mahalagang pag-uusap ang dalawa. Maglalabas si Carlotta ng sama ng loob at maibubunyag na rin sa wakas kay Edward na nagbalik lamang ang kapatid upang maghiganti. Babalik na si Leon sa PGC matapos kausapin ni Edward. Ito ay dahil sa hiling ng Hapon na mamumuhunan sa PGC na si Leon ang maging isa sa mga punong abala sa Meraviglie. Nais din nito makilala si Gen at mangyayari ang lahat sa Tokyo.

A Beautiful Affair (ABS-CBN): Kabanata/Episode 50

Kabanata 50

Ngayong mag-asawa na si Gen at Edward, magkakaroon ng hindi inaasahang suliranin sina Sabrina at Carlotta. Dahil sa pag-iisang dibdib na ito ay naging pag-aari na ng mag-asawa ang ari-arian ng isa’t isa, na nangangahulugan lamang na ang mga bahagi ng puhunan na pagmamay-ari ni Edward sa Ropa ay kay Gen na rin. Dahil mag-asawa na sila, nabili na rin ni Edward kay Gen ang Lucia na siyang pagtatayuan niya ng Meraviglie, habang nakuha naman ni Gen ang salapi upang mapigilan ang paggiba sa mga bahay ng kanyang mga tauhan sa Ropa. Sa kaarawan ni Leon ay ibabahagi sa kanya ni Mang Bert ang mga pangyayaring ito at ang mga kaganapan na rin sa PGC. May isang Hapon na mamumuhunan at kailangan ni Edward ng isang magandang pagpapaliwanag gamit ang mga iginuhit ni Leon. Ito na nga ba ang paraan upang makabalik si Leon sa PGC at mapalapit muli kay Gen?

A Beautiful Affair (ABS-CBN): Kabanata/Episode 49

Kabanata 49

Sa wakas ay nakahanap din ng paraan si Edward at Gen upang lutasin ang kanilang mga suliranin: ang pag-iisang dibdib. Dahil nakasaad sa iniwanang pamana ng lolo ni Gen na sa kamag-anak lamang maaring ipagbili ang Lucia, ang pagsasama nilang ito ni Edward ang pinakambisang paraan. Makukuha ni Edward ang Lucia, at makukuha naman ni Gen ang salapi na kailangan upang maging muling pangunahing may-ari ng Ropa. Ayaw muna ni Gen sa una, ngunit mapipilitan siyang dumating sa pasyang ito matapos makatanggap ng balita na ginigiba na ang tirahan ng kanyang mga tauhan. Ibabalita naman ni Carlotta kay Henry na malapit nang matupad ang kanilang mga balak. Gayunpaman, mukhang hindi pa rin masaya si Henry matapos marinig ang balita.

A Beautiful Affair (ABS-CBN): Kabanata/Episode 48

Kabanata 48

Patuloy pa rin ang mga pagtatalo sa pagitan ng magkakamag-anak. Nagtatalo ang mag-ate na Edward at Carlotta tungkol sa Lucia, na nais pa rin bilhin ni Edward upang maging lupa na tatayuan ng Meraviglie. Bukod dito, nais din niyang bilhin ang nasabing lupa upang makatulong kay Gen. Lalapit naman si Gen sa kanya upang idulog ang suliranin ukol sa pamunuan ng Ropa, na unti-unti nang nakukuha ni Sabrina dahil nabili na rin nito ang bahagi ng puhunan na pinanghahawakan ng kapatid na si Natalia, matapos itong takutin na ibubunyag ang kanyang lihim hinggil sa pakiki-apid nito sa isang mambabatas noong siya ay bata pa. Bukod sa pagbubunyag na ito, mapagaalaman naman na si Emy at ang batang nagngangalang Biloy na hinahanap ni Carlotta ay iisa.

A Beautiful Affair (ABS-CBN): Kabanata/Episode 47

Kabanata 47

Dali-daling tutungo si Gen sa Davao upang ayusin ang suliranin sa nasunog na pagawaan. Sasamahan siya ni Edward dahil ang pansariling sasakyan panghimpapawid nito ang kanilang gagamitin. Lingid sa kanilang kaalaman ay si Carlotta ang nag-utos na pasabugin ang pagawaan. Dahil din sa kanyang kagagawan ay makakabalik si Sabrina sa Ropa kung saan gugulatin nito ang pamangkin sa pamamagitan ng pagpasok sa isang pagpupulong kung saan ipaaalam nito sa lahat ang kanyang pagbabalik. Mahuhuli ni Leon si Emy at Mang Epong na aalis dapat papuntang Maynila upang hanapin ang kanyang ina. Ikaiinis ito ng binata ngunit sa payo na rin ng kaibigan na si Fred, hahayaan na nito ang dalawa at pagbibigyan gawa na rin ng araw araw na pangungulit ng mga ito. Sasabihan ni Sophia si Edward na muling gawin ang lahat upang maging sila ulit ni Gen, ngunit sasagot ito na hindi niya nais masira kung anuman ang kasalukuyang mayroon sila, ang kanilang pagkakaibigan na pipiliin niyang pangalagaan sa ngayon.

A Beautiful Affair (ABS-CBN): Kabanata/Episode 46

Kabanata 46

Ang Lucia na minana pa ni Gen sa kanyang lolo ang nagdadala ngayon ng suliranin hindi lamang sa kanya kundi pati na rin kay Carlotta. Kapwa nais ng dalawa na galawin ang nasabing lupa: Si Gen, upang ipagbili ito kay Edward; at si Carlotta, upang kamkamin ito at gamitin sa binabalak na paghihiganti ni Henry sa mga Saavedra. Hindi maaring ipagbili sa hindi kamag-anak ang lupain na nangangahulugan lamang na mananatili ito sa mga Saavedra. Si Emy at Mang Epong naman ang mangungulit kay Leon upang hanapin ang mga tunay na magulang nito, isang bagay na ayaw na niyang gawin pang muli dahil ayon sa kanya ay masaya na siya sa kanyang buhay. Sa pagwawakas ng kabanata ay masusunog ang isa sa mga pagawaan ng Ropa, isa pang suliranin na dadagdag sa mga alalahanin ni Gen, bukod sa hindi pa niya alam na pagbabalik ni Carlotta kay Sabrina ng puhunan ng Ropa.

A Beautiful Affair (ABS-CBN): Kabanata/Episode 45

Kabanata 45

Si Sabrina ang gagamitin ni Carlotta upang makapasok sa Ropa. Tutustusan niya ang mga pangangailangan nito upang mabili niya ang mga puhunan ng iba pang mga namuhunan dito. Isang hiling ang hihingin ni Sabrina upang maipakita ang pagtupad ni Carlotta sa usapan, ang pagpapadukot sa isang lalaking dati niyang tinutustusan. Matapos gawin ito ni Carlotta, buo na ang usapan ng dalawa at ito na ang magiging simula ng kanilang kampihan laban kay Gen at Edward. Mapapaaway naman si Edward dahil sa mga pagpuna ukol sa kanyang buhay pag-ibig pati na rin ang pagkakatanggal niya sa mataas na tungkulin sa Pierro Group of Companies. Aabot sa sukdulan ang lahat nang siya ay punahin na naman ng ama. Itatanong niya rito kung bakit ito galit na galit sa kanya, na hindi naman sasagutin ng matanda. Sa huli, siya ay mangangako na babangon mula sa kanyang pagkakadapa at ipapakita sa lahat kung paano lumaban ang isang Edward Pierro.

A Beautiful Affair (ABS-CBN): Kabanata/Episode 44

Kabanata 44

Hindi ka man maniwala, umabot hanggang kabanatang ito ang walang humpay na pagngalngal, yakapan, at pagbabahagi ng malulungkot na karanasan nila Carlotta at Henry. Kaya naman pag-uwi ni Carlotta sa bahay ay malaking pagkakamali ng kanyang ama na salubungin ang kanyang galit sa pamamagitan ng pagpapaalala sa kanya sa pagpapatakbo ng kanilang kabuhayan. Bakas na bakas sa mga mata ni Carlotta ang galit, at pagsasalitaan nito ang ama, na siyang matutunghayan ni Edward. Malalaman din niya sa unang pagkakataon na may isa pa palang anak si Carlotta, at pagkatapos ay sisisihin ang sarili dahil hindi niya alam at siya ang naging dahilan ng pagkakalayo ng mag-ina. Ipagdiriwang naman nila Gen ang kaarawan ng yumao niyang ama, at hindi magiging lubos ang kasiyahan kung walang sabunutan. Susugurin ni Sabrina ang pamangkin at magpapalakasan ang dalawa, ngunit lugi si Sabrina dahil maraming kakampi si Gen. Hihingi naman ng tulong si Mang Epong kay Emy na panghimasukan ang buhay ni Leon, sa pamamagitan ng paghahanap sa mga tunay na magulang nito.

A Beautiful Affair (ABS-CBN): Kabanata/Episode 43

Kabanata 43

Ang kabanatang ito ay ang pagpapatuloy ng paglalahad ni Carlotta ng mga masamang naganap sa kanyang buhay matapos mawalay sa anak sa Agusan. Matapos makatakas muli sa ama ay kakapit siya sa patalim upang mabuhay at upang balikan ang naiwang anak. Ipagbibili niya ang laman, malululong sa bawal na gamot, at sasama sa kung sinu-sinong lalaki. Sa kulungan ang kanyang bagsak kung saan makikilala niya si Rex, ang pinuno ng WoL na magbibigay ng bagong kahulugan sa kanyang buhay. Ngunit hahalayin siya ni Rex ng paulit-ulit. Mawawalan siya ng tiwala sa WoL at mangangakong pababagsakin silang lahat. Ilalahad din ni Henry ang kanyang nakaraan. Ang kanyang lolo pala ay naging kaibigan ni Arturo Pierro at Stephen Saavedra at lolokohin ng dalawa ang kanyang lolo upang makamkam ang kanilang lupain na nagngangalang Lucia. Sa huli, aaminin nito kay Carlotta na siya ang nagpapatay sa mga magulang ni Gen, ngunit hindi pa roon natatapos ang lahat dahil hindi pa tapos ang kanyang paghihiganti.

A Beautiful Affair (ABS-CBN): Kabanata/Episode 42

Kabanata 42

Si Leon nga ang nawawalang anak ni Carlotta. Ito ang aaminin niya kay Henry (Allan Paule), ang kanyang nagbabalik na dating kasintahan.  Naudlot ang kanilang pag-iibigan dahil sa pakikialam ng kanyang ama. Sinabi ni Arturo kay Carlotta na ipinagpalit siya ng kasintahan sa isang malaking halaga, habang isang sulat naman ang natanggap ni Henry na pinalabas na galing kay Carlotta. Ito ang naging dahilan ng kanilang paghihiwalay. Nang malaman ni Carlotta na siya ay nagdadalang-tao, minabuti nitong umalis na at magpakalayu-layo sa Agusan kung saan siya ay kilala bilang Amina. Ito rin ang pangalan ng ina ni Leon na nabanggit ni Emy sa kanya. Malalaman ni Arturo ang kinalalagyan ng anak at pupuntahan ito sa Agusan, kung saan pilit niyang ilalayo si Carlotta sa anak nito. Dahil si Edward lamang ang nakaaalam kung saan siya nagpunta, siya ang sisisihin ni Carlotta sa pagkakahiwalay niya sa kanyang anak.

A Beautiful Affair (ABS-CBN): Kabanata/Episode 41

Kabanata 41

Si Carlotta ang iluluklok sa dating tungkulin ni Edward. Sa halip na maging malungkot ay babatiin pa ni Edward ang kapatid at mangangako na aalalayan siya sa pagpapatakbo ng kanilang kabuhayan. Iba naman ng balak ni Carlotta sapagkat nais niyang samsamin ang kabuuan ng puhunan ng Pierro Group of Companies na kasalukuyang pag-aari ni Edward. Tutulungan siya ng ama na makamkam ito bilang kabayaran sa kanyang mga naging kasalanan sa anak sa nakalipas. Mabuti man ang pagharap sa ama, may lihim naman na balak si Carlotta laban dito. Darating ang isang panibagong tauhan na may kaugnayan kay Carlotta, ang kanyang dating kasintahan na hindi niya nakatuluyan nang dahil sa kanyang ama.