Ang Nawawalang Barangay

♣♣♣/♣♣♣♣♣

Ang baklang paroloristang si Brigido o mas kilala ng kanyang mga ka-barangay bilang BREE ay suma-sideline sa barangay hall bilang receptionist kaya naman siya ang unang-unang naging punong abala sa paghahanap ng mga nawawala. Mukhang supernatural ang datingan ng mga pangyayari. Ang siste, bigla na lang nawawala ang mga tao na tila ba nage-evaporate gaya ng nangyari kay Sonia na isa sa mga nag-report kay Bree. Sinamahan niya ito sa bahay ng nawawala nilang ka-barangay na aktibista na si Corazon. Pagpasok sa bahay ay nakaramdam na lang si Bree ng ubod na lamig na tila ba naka-aircon at biglang sa isang iglap ay wala na si Sonia. Sa pagpapatuloy ng misteryo, magkukumpulan ang mga taga-Barangay Talong Punay sa kulto ni Baby Gerl, isang naulilang bata na lumaking may mga naririnig na boses na sa kanyang palagay ay galing sa mga anghel. Mahahanap pa kaya nila Bree ang mga nawawalang ka-barangay?

Touch Me Now

♣♣♣♣/♣♣♣♣♣

The Dela Costa clan belongs to a socioeconomic elite that dictates what goes on in the Philippine political landscape. Marcelo is the only living son left to matriarch Conchita, whose devotion to Our Lady of Navire is equal to none. He occupies a post that gives him leeway for some societal engineering, micromanaging everything behind the scenes for those in power. His wife Josefina's only concern is getting her eight hours of sleep every night. Their older son Marcelito is active at university and is slowly but surely being drawn into the influence of his rallyist classmates. Younger son Joselito, on the other hand, is exploring his sexuality at an all-boys high school in Mandaluyong. Meanwhile, some family cousins run their own businesses: one, controlling what is published in print through the country's largest broadsheet which she owns; the other, being the proprietor of La Sirena, an underground den that attracts the rich and the powerful to secretly indulge in their carnal and narcotic desires.

Pan de Monio

♣♣♣♣/♣♣♣♣♣

Payak lamang ang pamumuhay ng magkaibigang Aves at Teroy Peklat sa bayan ng Antipolo. Hindi man malaya dahil sa pamamahala ng mga Kastila ay nakapag-aaral naman ang dalawa at nangunguna pa nga sa kanilang paaralan pagdating sa katalinuhan. Isang araw ay may matutuklasang krokis si Teroy Peklat sa kanilang kubo na mabilis niyang ipakikita kay Aves. Ang krokis ay naglalaman ng isang uri ng pagsusulat na hindi nila kilala at parurusahan pa nga sila ng Fraile dahil ayon sa kanya ay galing sa mga kampon ng kasamaan na sinasamba ng mga sinaunang Pilipino ang mga ito. Isang araw ay isang uwak ang dadalaw kay Aves at magsisimulang dalhan siya ng mga burloloy na gawa sa ginto, pilak at hiyas. Ituturo rin nito sa kanya kinalaunan ang kinalalagyan ng matagal nang hinahanap na nawawalang bantayog ng Birheng Itim na Santa Patron ng Antipolo. Bukod dito ay may matutuklasan pa siya tungkol sa matagal nang nawawalang ama.

Topograpiya Ng Lumbay

♣♣♣♣/♣♣♣♣♣

Isang lalaking nagngangalang Garcia Romualdez ang kukulitin ng tawag si Melody Aria. Sasagot lamang ang huli sa pangatlong tawag at dito siya aanyayahan siya ng lalaki na lumipad patungong Cebu upang samahan siya sa kasalukuyang kinalalagyan ng kanyang nawalay na inang si Ronaria. Hindi pa handa si Melody na harapin ang mga sugat ng nakaraan ngunit marahil ito na rin ang paraan upang makatakas siya sa pangungulila sa anak na sumama na sa ama nito upang mag-aral sa Boston. Isang manunulat naman na naghahangad ng bagong pagkakakitaan ang luluwas sa Tacloban. May mga ilang aklat na rin naman na nailimbag sa pangalan ni Ruis Quijano subalit hindi rin naman talaga siya sumikat. Hindi rin nakatulong ang pagkakalugi ng kayang hanapbuhay kaya ngayon ay nagtatangka siyang balikan ang pagsusulat. Ang hindi niya alam ay gagamitin lamang siya upang humabi ng paninira, isang bagay na pinagbantaan siyang buhay niya at ng dating asawa ang magiging kapalit kung hindi niya paninindigan. Magtatagpo ang landas ng tatlo sa paghahanap ng katotohanan sa isla ng Samar.

Muling Nanghaharana ang Dapithapon

♣♣♣♣/♣♣♣♣♣

Mag-uudyok ng iba’t-ibang kuru-kuro ang paglipat ng manunulat na si Mario Rafael de Polano sa bahay ng kanyang pinsan sa Imus. Matapos magpasya na talikuran na ang pagsusulat ay susunugin ng manunulat ang lahat ng kanyang mga akda, dahilan upang magkasundo ang mga kapitbahay na isa sa kanila ang dapat magtungo sa bahay ng manunulat at kausapin ito. Isa sa mga kapitbahay na babae, ina ng anak sa lalaking mayroon nang asawa, ang maaatasan na makipag-usap sa manunulat. Siya naman ay nangangarap na maging manunulat din ngunit naniniwalang ang kahinaan niya sa pagsusulat sa wikang Tagalog ay isang malaking hadlang upang maisakatuparan ito. Tatagal din ng ilang buwan ang pagkakaibigan ng dalawa ngunit isang araw ay bigla na lang maglalaho si Rafael sa Imus. Sa kanyang pagkawala ay matatagpuan ng babae sa pintuan ng kanyang bahay ang mga talaarawan at iba pang mga naisulat na ni Rafael, at dito makikilala ng lubos ng babae ang mailap na lalaki.

Ang Lahat ng Hayop sa Ating mga Yapak

♣♣♣♣♣/♣♣♣♣♣

Sa taong 2013 ay yayanigin ang Pateros ng isang karumal-dumal na pangyayari: ang panggagahasa at pagpaslang sa isang dalagang nagngangalang Janina matapos itong maglasing at mahiwalay sa mga kaibigan. Ang pagbibintangan at makukulong ay ang tagapaghatid ng pagkain na si Eli Boy Bustalenya na siya namang igigiit sa mga kinauukulan na wala siyang kinalaman sa mga pangyayari. Sa kasamaang palad ay isang larawan na kuha ng mamamahayag na si Dexter de Dios ang makakasagap kay Eli Boy na siyang magdiriin dito. Lampas sampung taon din ang magdaraan at sa pag-uwi ng anak ni Dexter na si Andrew upang tumanggap ng parangal ng ama ay mauungkat ang nakalipas kasama ang mga bagong kaalaman na maaaring magpawalang-sala sa isang tao na baka sa kahuli-hulihan ay wala naman palang kinalaman sa mga pangyayari. Ang panibagong pag-uusisa ay maglalatag din ng mga mabubunyag na kaugnayan sa pagitan ng naturang pagkakasala at malawakang katiwalian sa pamahalaan.

Lahat Ng B

♣♣♣/♣♣♣♣♣

Ilang dekada na ang lilipas pero tuloy pa rin ang pagsusulat ni Lucas ng mga novels at itutuloy nga niya ang mga naudlot na love story nila Irene, Sandra, Erica at Ester. Ang hindi talaga niya maituloy tuloy is yung love story nila ni Bessie. May time jump na ilang dekada at tumanda na ang mga characters. Nasa kaliwaan stage na sila Irene at Jordan. Si Sandra naman kukunin na ni Lupe after makalaya nung isa sa kulungan pero makokonsensya sila kasi paano na yung asawa niya na si Ruben? Si Erica pipiliing bumalik sa Maldiaga para hanapin si Jake kahit successful na ang career niya sa Manila. Si Ester at Sara nagkikita tuwing Friday pero hurdle pa rin nila yung asawang matanda na si Pio. Si Bessie naman iniwan na ni Brigs at may Alzheimer’s na kaya dinadalaw dalaw na lang ni Lucas sa nursing home.

Para Kay B

♣♣♣♣/♣♣♣♣♣

Isang frustrated writer na nangngangalang Lucas ang nagsusulat ng una niyang nobela na gusto niyang tawagin sa pamagat na Para Kay B. Ang B na tinutukoy ay si Bessie, ang babaeng kanyang iniibig pero medyo mukhang di talaga sila itinadhana. Even then, sulat pa rin ng sulat si Lucas ng love stories, lima lahat. Yung isa ay yung sa kanila ni B habang yung iba naman e halo-halong may imbento lang and based naman on real people yung iba. For example, yung incestuous love story ni Sandra ay based sa kahera ng motel na tinutuluyan niya para magsulat. Bukod dun, meron din siyang entry about Ester na middle aged mother na may lesbo love affair. Si Erica na galing sa isang fictional island called Maldiaga kung saan wala silang concept ng pag-ibig. At siyempre yung unang kwento ng libro tungkol kay Irene at Jordan na pinaghiwalay ng panahon pero pagtatagpuing muli ng tadhana.

Bata, Bata... Pa'no Ka Ginawa?

♣♣♣♣/♣♣♣♣♣

Si Lea Bustamante ay isang ina. Ina ng dalawang anak na magkaiba ang ama. Ang kanyang panganay na si Ojie ay anak niya sa asawang si Raffy na nananatiling kasal sa kanya kahit sila ay magkahiwalay na. Iniwan siya nito upang magtrabaho sa probinsya kung saan kasama sana siya subalit umayaw siya dahil ayaw niyang iwan ang trabaho niya. Si Maya naman ay anak niyang bunso sa kanyang kinakasama na si Ding. Mama’s boy si Ding at bihira magpakita sa bahay nila dahil lagi itong nasa poder ng kanyang ina. Madalas magkaroon ng mga hindi pagkakaunawaan sa eskwela ng mga bata dahil sa kanilang magkaibang apelyido kahit na iisa lang naman ang kanilang nanay. Madalas nga ay napipika na si Lea sa mga patutsada at tanong na paulit ulit niyang sinasagot kahit wala naman siyang obligasyon na gawin iyon. Isang araw ay biglang magbabalik si Raffy at maghahangad ng puwang sa buhay ng anak.

Agaw-Anino II

♣♣♣/♣♣♣♣♣

Isa na ngayong manunulat si Arturo at ang kanyang pinagkakaabalahan ay ang pagkalap ng samu’t saring salaysay ukol sa mga kababalaghan na hindi kasalukuyang maipaliwanag ng agham at lipunan. Susuyurin niya ang mga lalawigan at maliliit na bayan upang makapanayam ang mga taong nais magbahagi ng kanilang mga karanasan. Ilan lamang dito ay ang isang lola na diumano’y nanirahan ng matagal sa isang yungib na may bantang panganib na kumuha sa isa nilang kaibigan. Nariyan din ang salaysay ng mga taga lalawigan ukol sa isang lalaking bihasa sa pagtugis sa mga aswang at kasapi ng isang pangkat na tumutugis sa mga nasabing nilalang. Sa huli ay iibig ang lalaki sa isang magandang dilag na kanyang magiging asawa. Malalaman lamang niya sa huli na kailangan niyang mamili sa pagitan ng pag-ibig at tungkulin. Sari saring mga salaysay na ang naipon ni Arturo at balak niyang ilimbag ang mga ito sa isang aklat.

Agaw-Anino

♣♣♣♣/♣♣♣♣♣

Mabubuo ang pagkakaibigan sa isang pangkat ng mga batang lalaki sa maliit na bayan ng San Pablo. Sina Arturo, Dennis, Maykel, Teod at Ron ay mga mag-aaral na nasa iisang baitang ng kanilang paaralan habang dalawang taon naman ang tanda nila sa pang-anim nilang kasapi na si Peklat. Puno ng kagaguhan ang kanilang kabataan, mula sa panlilinlang ng mga matatanda sa kanilang bayan hanggang sa pagsasalaysay ng mga kathang isip at kababalaghan na kanilang kinalilibangan. Isa na nga rito ay ang salaysay ni Art ukol sa isang matandang diumano ay aswang na naninirahan sa isang bundok malapit sa bahay ng kapatid ng kanyang ina sa lalawigan. Magtutungo ang magkakaibigan doon at makikituloy sa mga kamag-anak upang isakatapuran ang kanilang pakay na supilin ang aswang at iligtas ang mga taong bayan. Kabalbalan marahil subalit sa mga mata ng isang bata ay may mga bagay sa buhay na mahirap maunawaan pati na rin mga kamaliang habang buhay na mananatili sa kanilang mga gunita.

Ang Suklam Sa Ating Naaagnas Na Balat

♣♣♣♣/♣♣♣♣♣

Hindi naniniwala si Dondi Amadeo na bangkay ng nawawalang kapatid niya na si Divine ang natagpuan na nakalibing sa isang tambak sa C-6. Sadyang malinis ang kalansay na tila ba inilipat lamang doon. Malapit nang lumaya si Bonifacio Bonifacio na kilala ng kanyang mga kaanak at kaibigan bilang Boni. Isang hindi magandang balita na umano'y pagpanaw ng kanyang dalagang anak na si Sarah ang tatambad sa kanya bago siya makalaya matapos ang pitong taong pagkakakulong. Si Marisol naman ay isang mamamahayag na pilit naghahanap ng balitang gigimbal sa madla. Magsasalubong ang mga landas nilang tatlo at sila ay magtutulungan upang hanapin ang katotohanan. Ang tanong ay handa kaya sila sa kanilang matutunghayan kapag kanilang nalaman kung sino sino ba ang mga nasa likod ng kanilang mga hindi kaaya-ayang kapalaran? Kaya ba nilang harapin ang kagimbal-gimbal na sasapitin ng kanilang mga mahal sa buhay sa ngalan ng katarungan?

Thirty Virgins

♣♣♣/♣♣♣♣♣

Naghahanapbuhay si Leslie sa isang maliit na pahayagan kung saan inaabot abutan siya ng kanyang tagapangasiwa na si Boss JM ng tig-lilimang daan at paminsan-minsan ay isang libo upang gumawa ng mga bagay-bagay na kailangan nilang ilihim sa pamunuan. Ang barya baryang ito ay magiging limangdaang libong piso kung tatanggapin lamang ni Leslie ang alok ni Boss JM na paunlakan ang labag sa batas na kalakaran ng Tsinoy na mangangalakal na si Peter Tan. Anong kalakal nga ba ito? Bawat taon ay namimili ang Tsinoy at ang mga kasama nito sa pangangalakal ng tatlumpung kababaihan na wala pang karanasan sa pagtatalik. Hindi naman pinipilit ang mga babaeng ito. Sila ay nasa wastong gulang na at sila pa nga ang kusang ipinagbibili ang kanilang kawalan ng karanasan sa mga nais magbayad na taga-ibang bansa. Ang halaga? Tumataginting na isang milyong piso. Ang tungkulin ni Leslie? Ang pakikipanayam sa tatlumpu upang malaman ang kani-kanilang talambuhay. Sa huli ay sasagi rin sa isip niya kung sapat na nga ba ang limandaang libo.

Kalahating Bahaghari

♣♣♣♣♣/♣♣♣♣♣

Hindi lamang ang mga magulang kundi pati na rin kanyang pandinig ang kukunin kay Jim ng isang hindi inaasahang pangyayari. Siya ay maiiwan sa pangangalaga ng kanyang Kuya Luis na magtataguyod sa kanya upang makapag-aral at makapagtapos. Ang isa sa magiging pangunahing suliranin ng mag-Kuya ay ang pag-iisang dibdib nila Luis at Marina na matindi ang galit sa mga tomboy at bakla. Ito rin ang magiging dahilan kung bakit maaantala ang pagtanggap ni Jim sa sariling katauhan. Matapos maranasan ang hindi kaaya-ayang pakikisama ng hipag ay bubukod ito at matututong mamuhay mag-isa habang tinutuklas ang kanyang pagkatao. Hindi naman makaiiwas si Marina sa mga tomboy at bakla dahil magdaan ang maraming taon ay ang mga anak naman nila ni Luis ang lalantad na hindi ayon sa kanyang paniniwala tungkol sa nararapat na kasarian. Sa makabagong panahon ay ang kanyang apo naman na si Joshua ang sasabak sa mga pangungutya ng lipunang sadyang ayaw umunawa.

Narkokristo, 1896

♣♣♣♣/♣♣♣♣♣

1896. Panahon ng Kastila. Ang Pilipinas ay malapit nang makalaya sa kamay ng mga dayuhang mananakop ngunit kailangan munang dumanak ang dugo upang ito ay makamit. Payak ang pamumuhay ni Isaak na nakatira sa isang kubo kasama ang kanyang mga magulang na sila Tata Selo at Aling Oropia. Sila ay mga mag-iitik na ang pangunahing suki ay ang mag-asawang Kastila na nakatira sa malaking bahay at may kaibigang manggagamot na dumadalaw galing Alemanya. Sinasama si Isaak ng kaibigang si Domeng sa malaking bahay na iyon kung saan marami silang matutuklasang likim. Hawak naman sa leeg ni Padre Blas si Domeng dahil nasa mga kamay nito nakasalalay ang tadhana ng kanyang kapatid na si Francisca. Gaya ng sa iba pang mga Pilipino, matindi at hindi makatao ang pinapataw na buwis ng pamahalaan at simbahan subalit lahat ng panggigipit ay may katapusan. Gawa na tayong lahat ay sa abo nanggaling, sa abo rin tayo lahat babalik.

Isang Milyong Piso

♣♣♣♣/♣♣♣♣♣

Maghihiwalay ng landas ang magkasintahang Jose at Selya sa pagsiklab ng ikalawang digmaang pandaigdig kung saan sasali si Jose sa himagsikan laban sa mga Hapon. Doon ay maililigtas niya ang buhay ng isang Amerikano na pawang bilanggo rin ng mga kalaban. Matapos magpagaling ang dalawa ay babalik na sa kanyang bansa ang Amerikano ngunit masugid na tatanungin ang bagong kaibigan kung paano siya makatatanaw ng utang na loob. Pabirong sasabihin ni Jose na bigyan siya ng isang milyong piso kung sakaling yumaman ang kaibigan. Hindi naman kaaya-aya ang naghihintay na kapalaran ni Jose pagbalik sa Bulakan lalo pa ngayon na napinsala na ang kanyang bisig at kakayahan na maghanap-buhay. Ipapasok siya ng mga pinsan sa mga gawaing hindi naaayon sa batas at dito ibubuhos ng binata ang lakas at panahon matapos malaman na si Selya ay nililigawan na ng isang Major Alfredo Lozano na higit na makapagbibigay sa kanya ng maginhawang buhay.

Ang Larong Nagwakas Sa Atin

♣♣♣♣♣/♣♣♣♣♣

Magmula ng lumipat galing Quezon City patungong Las Piñas ay sa laro na ng Chess umiikot ang daigdig ni Dennis Manansala kahit na wala gaanong pagkakataon upang laruin niya ito dahil tila ba hindi ito ganoon kasikat bilang laro sa bago niyang paaralan. Magbabago ang lahat nang mapasama ito sa taunang palaro ng paaralan kung saan mapipilitan sumali si Esther Pamintuan na tinguriang pinakamatalino sa kanilang buong pangkat. Mula sa pagiging walang alam sa laro ay magiging bihasa si Esther sa tulong na rin ni Dennis sa loob ng apat na taon na kanilang ilalagi sa kanilang paaralan. Habang umiigting ang kanilang pagkakalulong sa laro ay titindi rin ang kanilang pagtitinginan sa isa’t-isa. Maraming pagkakataon na ito ay makabubuti subalit mayroon ding mga panahon na ito ay makasasama sa kanilang dalawa hanggang sa umabot na nga ang lahat sa huling laro na siyang magiging tuldok ng kanilang apat na taon sa High School at magwawakas sa kanila.

Canal de la Reina

♣♣♣♣/♣♣♣♣♣

Ikagugulat ni Caridad ang kanyang daratnan sa Canal de la Reina pati na rin ang kinahinatnan nito, ang pook na kinalakihan niya at ng kanyang kapatid. Ipinamana sa kanya ng kanilang mga magulang ang lupa. Kasama ang asawang si Salvador at ang mga anak na sina Leni at Junior, magbabalik si Caridad upang tignan ang lupa na dapat ay nasa pangalan niya, subalit ang bubulaga sa kanya ay ang pagsalubong sa kanila ni Nyora Tentay na magsasabing siya ang may-ari ng lupa at ng bahay na nakatayo roon. Ipinagbili raw ito ng mga katiwala nila Caridad at may hawak siyang titulo. Isang matinding laban sa hukuman ang susunod na magaganap kung saan maglalaban ang dalawang panig upang maibigay ang lupa sa tunay na may-ari. Ngunit dahil maliit ang daigdig na ginagalawan, hindi rin inaasahan na may mga landas na magtatagpo mula sa magkabilang panig. Sino kaya ang magtatagumpay sa huli na magiging totoong tagapangalaga ng lupang pinag-aagawan?

Ang Kapangyarihang Higit sa Ating Lahat

♣♣♣♣♣/♣♣♣♣♣

Magkasama na nangungupahan ang magkaibang Dodong at Buldan sa isang pook malapit sa Dreamland. Walang matinong hanapbuhay ang dalawa at kadalasan ay nandurukot lang upang makaraos. Ang kasintahan ni Dodong na si Che ay namamahala naman ng isang pook aliwan kung saan nagkikita ang mga naghahanap ng aliw at mga babaeng naglalako ng laman. Pagbabantaan ang buhay ni Che dahil sa panibugho ng isang suki niya na may hawak na kapangyarihan at ibibintang ito sa kasintahan. Si Butsok naman ang panganay ng mag-asawang Delfin at Marife. Magsasabay-sabay ang kanilang mga kasawiang-palad sa buhay sa pagsulpot ng mga bangkay ng mga bakla na mapapag-alamang kinikitil ang buhay ng isang di pa kilalang may galit sa kanilang uri. Habang abala ang mga kinauukulan sa paghahanap sa salarin, patuloy ang buhay sa paligid ng Dreamland kung saan matatagpuan ang mga nasa laylayan ng lipunan, isang kahig isang tuka at pinaglalaruan lang ng mga nasa kapangyarihan.

Luha ng Buwaya

♣♣♣♣/♣♣♣♣♣

Ang bayan ng Sampilong ay pinaghaharian ng mag-asawang Don Severo at Doña Leona Grande na nagmamay-ari ng mga lupain kung saan nagsasaka ang mga manggagawa. Mayroon ding pook doon na tinatawag na Tambakan na pinamamahayan naman ng mga mahihirap na walang mga sariling tahanan. Isa sa mga ito ay si Andres at ang asawang si Sedes na lumipat doon mula sa Maynila matapos lumisan ang mga Hapon. Si Mestrong Bandong naman ay tumatayong pansamantalang tagapangasiwa ng paaralan sapagkat siya isang guro. Ang pag-ibig niya ay iaalay sa marikit na dalagang si Pina na pinagnanasahan naman ng kanang-kamay ng mga Grande na si Dislaw na kanilang inuutusan upang sikilin ang mga manggagawa. Sa gitna ng pagmamalupit ng mag-asawa ay matutuklasan ni Andres na may habol ang kanyang mga kanunu-nunuan sa lupain ng mga Grande dahil kinamkam lamang ito ng lolo ni Leona na Kastila. Handa na ba silang makipag-agawan ng lupa?