Trese: Kabanata/Episode 6

Kabanata 6

Isisiwalat ni Datu Talagbusao ang katotohanan ukol sa pagkatao ni Alexandra Trese habang bihag ito ng kambal na panandaliang mapapailalim sa kapangyarihan ng kanilang ama. Ayon sa panginoon ng digmaan, ang ama ni Alexandra ay nagsinungaling sa lahat ubang baguhin ang kanilang tadhana. Hindi talaga namatay ang nakatatandang kambal ni Alexandra matapos itong maipanganak. Sa halip ay buhay itong isinilang at pinatay lamang ni Anton kinalaunan dahil ayon sa itinakda, ang ika-limang anak ng ika-anim na anak ang sisira sa daigdig habang ang ika-anim na anak ng ika-anim na anak naman ang magbabalik ng kaayusan sa pamamagitan ng paghatol at pagbuo ng bagong sangkalibutan. Mananaig pa rin ang kabutihan sa puso ng dalaga at magagawa nitong ipatapon at ikulong ang kalaban sa ibang daigdig sa tulong ng kambal matapos nilang bumalik sa katinuan. Masasawi si Kapitan Guerrero sa sagupaan. Sa huli, isang jiangshi ang mamamataan na nagkakalat ng lagim sa Maynila, isang bagong hamon sa lakan.

Trese: Kabanata/Episode 5

Kabanata 5

NAKALIPAS: Magpupulong ang mga pinuno ng mga angkan upang pagpasyahan ang kapalaran ng kambal. Maninindigan si Anton na ampunin at kalingain ang dalawa kahit na hindi sang-ayon dito ang pinuno ng mga aswang. Sisimulan ni Alexandra ang kanyang pagsasanay bilang bagong lakan, ang ika-anim na anak ng ika-anim na anak. Limang taon ang lilipas at sa kanyang pagbabalik ay wala na ang kanyang ama. KASALUKUYAN: Lalantad si Mayor Sancho Santamaria bilang utak ng malawakang pagsabog sa kalakhang Maynila. Gamit ang itim na kapangyarihan ay bubuo siya ng hukbo ng mga bilanggong wala sa katinuan at isang sagupaan ang magaganap sa gitna nila Alexandra at ng mga kalaban. Lalantad si Nuno bilang taksil na nagbigay ng kapangyarihan kay Sancho. Magagawang tapusin nila Alexandra ang laban sa tulong ng mga tikbalang at taong hangin. At sa kanilang buong pag-aakala na sila ay nagwagi na, biglang lilitaw si Datu Talagbusao na matagal na palang nasa katawan ni Heneral Villar.

Trese: Kabanata/Episode 4

Kabanata 4

NAKALIPAS: Matatagpuang patay ng mag-amang Anton at Alexandra si Ramona habang bihag naman ni Datu Talagbusao ang kambal. Masasaksak si Anton ng panginoon ng digmaan ngunit matatapos ni Alexandra ang lagusan upang maipatapon ang datu. KASALUKUYAN: 50 bangkay ang nawawala sa kanilang libingan habang isang maramihang pagpatay naman ang magaganap sa isang squatters area kung saan ang pinaghihinalaang utak ay ang nakakulong na si Mayor Sancho Santamaria. Maya-maya pa ay sasalakayin na ng mga bangkay na nabuhay ang himpilan nila Kapitan Guerrero. Mapagaalaman nila Alexandra na mayroong nang-angkin sa isa sa tatlong isinumpang batong buhay panawag sa patay na kailangan nilang sabay-sabay sirain upang mapigilan ang pagsalakay. Mahahanap nila ito sa isa sa mga bilanggo na may galit sa mga kinauukulan. Susubukang tuklasin ni Hank (Christopher Carlo Caling) ang katotohanan kay Amang Paso ngunit lulusubin sila ng isang lalaking may bomba sa katawan.

Trese: Kabanata/Episode 3

Kabanata 3

NAKALIPAS: Sa tulong ng kanyang kambal na anak ay bubuhaying muli ni Ramona ang dakilang Datu Talagbusao sa pamamagitan ng pag-alay ng mga puso ng kanyang mga pinaslang na sundalo at ng kanilang pinuno. Laking gulat na lang nito ng salakayin silang mag-iina ng naturang panginoon ng digmaan. KASALUKUYAN: Isang manggagamot ang papatayin ng isang nilalang na nagtatago sa kadiliman na tanging mga pulang mata lang ang kapansin-pansin. Dadalhin ng pangyayaring ito sina Alexandra Trese at ang kambal kay Nova Aurora, isang sikat na artista na nasa pangangalaga ni Amang Paso na pinuno ng angkan ng Pulang Lupa. Kanilang mapapagtanto na isang tiyanak ang tumutugis sa magkaibigang manggagamot at artista. Walang awang papatayin ni Aurora sa saksak ang tiyanak na sumapi sa kanyang sanggol na kanilang sadyang pinabayaan sa gubat. Babalaan ni Amang Paso si Trese ukol sa isang paparating na panganib at pagtataksil. Babalikan naman si Aurora ng mga tiyanak upang patayin sa gabing iyon.

Trese: Kabanata/Episode 2

Kabanata 2

NAKALIPAS: Kasama ang batang Alexandra ng kanyang amang si Anton (Eugene Adalia) sa pagsisiyasat ng pagpaslang ng mga dating sundalo at ng kanilang mga alalay na pinatay at tinanggalan ng mga puso. KASALUKUYAN: Hihingin ni Kapitan Guerrero ang tulong ng dalaga upang lutasin ang isang kapanganyayaang dulot ng pabilisan ng mga sasakyan. Ang mga bakas ng sulikap ang magtuturo sa kanya sa pinuno ng mga tikbalang na si Ginoong Armanaz. Sa tulong ng dalawang taong hangin ay makikipagtimpalak si Alexandra gamit ang kanyang sariling sasakyan at kanyang matutuklasan na ang anak ni Ginoong Armanaz na si Maliksi (Steve dela Cruz) ang kanilang hinahanap. Isa pang paghihinala ang magdadala kay Trese kay Bagyon Lektro na pinuno ng isang angkan na may kakayahang gumamit ng dagitab. Sasalakayin siya ng anak nitong si Bagyon Kulimlim na kanilang mapapatay sa tulong ng Nuno at ng kanyang alagad. Babalaan ni Lektro si Trese ukol sa isang paparating na panganib.

Trese: Kabanata/Episode 1

Kabanata 1

Sa isang pangkaraniwang gabi ay biglang titirik ang MRT. Bababa ang mga nakasakay ngunit hindi na masisilayang muli. Sa halip ay isang tren na puno ng dugo subalit walang mga bangkay ang tanging maiiwang bakas. Makakarating ang balita kay Alexandra Trese (Liza Soberano), ang batang lakan na namamagitan sa daigdig ng sangkatauhan at ng mga kampon ng kadiliman. Kasalukuyang nagsisiyasat sa pagkamatay ni Gina Santos, ang white lady ng Balete Drive, ang dalaga ay hihingan ng tulong ni Kapitan Guerrero (Apollo Abraham) upang lutasin ang nasabing kababalaghan. Sa kanyang pakikipag-ugnayan sa Nuno (Christian Velarde) at kay Ibu, ang diwata ng kamatayan, kanyang matutuklasan ang sabwatan ng isang angkan ng mga aswang at ni Mayor Sancho Santamaria (Rene Tandoc), ang kalaguyo ng white lady na ginagamit ang kanyang katungkulan upang lipulin ang mga squatter at ialay sa mga aswang. Sa tulong ng kambal na sina Crispin at Basilio (Simon dela Cruz) ay susubukang tugisin ni Trese ang kanyang mga kalaban, mapa-tao man o aswang.